ANTIPHONAE ET ORATIONES ex editione typica tertia Missalis Romani, 2002

[marcobo88]

DOMINICA II “ PER ANNUM ”

Ant. ad introitum Ps 65, 4
Omnis terra adoret te, Deus, et psallat tibi;
psalmum dicat nomini tuo, Altissime.

Collecta
Omnipotens sempiterne Deus,
qui cælestia simul et terrena moderaris,
supplicationes populi tui clementer exaudi,
et pacem tuam nostris concede temporibus.
Per Dominum.

Super oblata
Concede nobis, quaesumus, Domine,
hæc digne frequentare mysteria,
quia, quoties huius hostiæ commemoratio celebratur,
opus nostræ redemptionis exercetur.
Per Christum.

Praefatio de Dominicis “Per Annum” II (In dominica)
Vere dignum et iustum est, æquum et salutare,
nos tibi semper et ubique gratias agere:
Domine, sancte Pater, omnipotens æterne Deus:
per Christum Dominum nostrum.
Qui, humanis miseratus erroribus,
de Virgine nasci dignatus est.
Qui, crucem passus, a perpetua morte nos liberavit
et, a mortuis resurgens, vitam nobis donavit æternam.
Et ideo cum Angelis et Archangelis,
cum Thronis et Dominationibus,
cumque omni militia cælestis exercitus,
hymnum gloriæ tuæ canimus,
sine fine dicentes: Sanctus, Sanctus, Sanctus…

Praefatio Communis II (In feriis)
Vere dignum et iustum est, æquum et salutare,
nos tibi semper et ubique gratias agere:
Domine, sancte Pater, omnipotens æterne Deus:
Qui bonitate hominem condidisti,
ac iustitia damnatum misericordia redemisti:
per Christum Dominum nostrum.
Per quem maiestatem tuam laudant Angeli,
adorant Dominationes, tremunt Potestates.
Cæli cælorumque Virtutes, ac beata Seraphim,
socia exsultatione concelebrant.
Cum quibus et nostras voces ut admitti iubeas, deprecamur,
supplici confessione dicentes: Sanctus, Sanctus, Sanctus…

Ant. ad communionem Cf. Ps 22, 5
Parasti in conspectu meo mensam,
et calix meus inebrians quam præclarus est!
Vel: 1 Io 4, 16
Nos cognovimus et credidimus caritati,
quam Deus habet in nobis.

Post communionem
Spiritum nobis, Domine, tuæ caritatis infunde,
ut, quos uno cælesti pane satiasti,
una facias pietate concordes.
Per Christum.

[marcobo88]

Die 17 ianuarii

S. Antonii, abbatis

Memoria

Ant. ad introitum Cf. Ps 91, 13-14
Iustus ut palma florebit,
sicut cedrus Libani multiplicabitur,
plantatus in domo Domini, in atriis domus Dei nostri.

Collecta
Deus, qui beato Antonio abbati tribuisti
mira tibi in deserto conversatione servire,
eius nobis interventione concede,
ut, abnegantes nosmetipsos,
te iugiter super omnia diligamus.
Per Dominum.

Super oblata
Accepta tibi sint, Domine, quaesumus,
munera nostræ servitutis,
pro beati Antonii commemoratione altari tuo proposita,
et concede, ut, a terrenis impedimentis absoluti,
te solo divites efficiamur.
Per Christum.

Praefatio de Sanctis Religiosis
Vere dignum et iustum est, æquum et salutare,
nos tibi semper et ubique gratias agere:
Domine, sancte Pater, omnipotens æterne Deus:
In Sanctis enim, qui Christo se dedicaverunt
propter regnum cælorum,
tuam decet providentiam celebrare mirabilem,
qua humanam substantiam
et ad primæ originis revocas sanctitatem,
et perducis ad experienda dona,
quæ in novo s.culo sunt habenda.
Et ideo, cum Sanctis et Angelis universis,
te collaudamus, sine fine dicentes: Sanctus, Sanctus, Sanctus

Ant. ad communionem Cf. Mt 19, 21
Si vis perfectus esse,
vade, vende quæ habes,
et da pauperibus, et sequere me,
dicit Dominus.

Post communionem
Sacramentis tuis, Domine,
salubriter enutritos,
cunctas fac nos semper insidias inimici superare,
qui beato Antonio dedisti
contra potestates tenebrarum claras referre victorias.
Per Christum.

[marcobo88]

HEBDOMADA II “PER ANNUM”

Ut supra, in diebus 15, 16, 18, 19 Ianuarii.

Vel:

Die 20 ianuarii

S. Fabiani, papæ et martyris

Collecta
Deus, tuórum glória sacerdótum, præsta, quǽsumus,
ut, beáti Fabiáni mártyris tui interveniénte suffrágio,
eiúsdem proficiámus fídei consórtio dignóque servítio.
Per Dóminum.

Vel:

S. Sebastiani, martyris

Collecta
Præsta nobis, quǽsumus, Dómine, spíritum fortitúdinis,
ut, glorióso exémplo beáti Sebastiáni mártyris tui edócti,
tibi magis quam homínibus obœdíre discámus.
Per Dóminum.

[marcobo88]

DOMINICA III “ PER ANNUM ”

Ant. ad introitum Cf. Ps 95, 1.6
Cantate Domino canticum novum,
cantate Domino, omnis terra.
Confessio et pulchritudo in conspectu eius,
sanctitas et magnificentia in sanctificatione eius.

Collecta
Omnipotens sempiterne Deus,
dirige actus nostros in beneplacito tuo,
ut in nomine dilecti Filii tui
mereamur bonis operibus abundare.
Per Dominum.

Super oblata
Munera nostra, Domine, suscipe placatus,
quæ sanctificando nobis, quaesumus,
salutaria fore concede.
Per Christum.

Praefatio de Dominicis “Per Annum” III (In dominica)
Vere dignum et iustum est, æquum et salutare,
nos tibi semper et ubique gratias agere:
Domine, sancte Pater, omnipotens æterne Deus:
Ad cuius immensam gloriam pertinere cognoscimus
ut mortalibus tua deitate succurreres;
sed et nobis provideres de ipsa
mortalitate nostra remedium,
et perditos quosque unde perierant, inde salvares,
per Christum Dominum nostrum.
Per quem maiestatem tuam adorat exercitus Angelorum,
ante conspectum tuum in æternitate lætantium.
Cum quibus et nostras voces
ut admitti iubeas, deprecamur,
socia exsultatione dicentes: Sanctus, Sanctus, Sanctus...

Praefatio Communis III (In feriis)
Vere dignum et iustum est, æquum et salutare,
nos tibi semper et ubique gratias agere:
Domine, sancte Pater, omnipotens æterne Deus:
Qui per Filium dilectionis tuæ,
sicut conditor generis es humani,
ita benignissimus reformator.
Unde merito tibi cunctæ serviunt creaturæ,
te redempti rite collaudant universi,
et uno Sancti tui te corde benedicunt.
Quapropter et nos cum omnibus te Angelis celebramus,
iucunda semper confessione dicentes: Sanctus, Sanctus, Sanctus...

Ant. ad communionem Cf. Ps 33, 6
Accedite ad Dominum et illuminamini,
et facies vestræ non confundentur.
Vel: Io 8, 12
Ego sum lux mundi, dicit Dominus;
qui sequitur me, non ambulat in tenebris,
sed habebit lumen vitæ.

Post communionem
Præsta nobis, quaesumus, omnipotens Deus,
ut, vivificationis tuæ gratiam consequentes,
in tuo semper munere gloriemur.
Per Christum.

[marcobo88]

HEBDOMADA III “PER ANNUM”

Ut supra.

Vel:

Die 22 ianuarii

S. Vincentii, diaconi et martyris

Collecta
Omnipotens sempiterne Deus,
tuum in nobis Spiritum clementer infunde,
ut corda nostra ea dilectione valida potiantur,
per quam sanctus martyr Vincentius
omnia corporis tormenta devicit.
Per Dominum.

[marcobo88]

Die 24 ianuarii

S. Francisci de Sales, episcopi et Ecclesia doctoris

Memoria

Ant. ad introitum Cf. Sir 15, 5
In medio Ecclesiæ aperuit os eius,
et implevit eum Dominus spiritu sapientiæ et intellectus;
stolam gloriæ induit eum.

Collecta
Deus, qui ad animarum salutem
beatum Franciscum episcopum
omnibus omnia factum esse voluisti,
concede propitius, ut, eius exemplo,
tuæ mansuetudinem caritatis
in fratrum servitio semper ostendamus. Per Dominum.

Super oblata
Per hanc salutarem hostiam quam offerimus tibi, Domine,
cor nostrum divino illo Sancti Spiritus igne succende,
quo mitissimum beati Francisci animum
mirabiliter inflammasti. Per Christum.

Praefatio de Sanctis Pastoribus
Vere dignum et iustum est, æquum et salutare,
nos tibi semper et ubique gratias agere:
Domine, sancte Pater, omnipotens æterne Deus:
per Christum Dominum nostrum.
Quia sic tribuis Ecclesiam tuam sancti Franciscifestivitate gaudere,
ut eam exemplo piæ conversationis corrobores,
verbo prædicationis erudias,
grataque tibi supplicatione tuearis.
Et ideo, cum Angelorum atque Sanctorum turba,
hymnum laudis tibi canimus, sine fine dicentes: Sanctus, Sanctus, Sanctus…

Ant. ad communionem Cf. Lc 12, 42
Fidelis servus et prudens,
quem constituit Dominus super familiam suam,
ut det illis in tempore tritici mensuram.

Post communionem
Concede, quaesumus, omnipotens Deus,
ut, per sacramenta quæ sumpsimus,
beati Francisci caritatem et mansuetudinem
imitantes in terris,
gloriam quoque consequamur in cælis. Per Christum.

[marcobo88]

Die 25 ianuarii

IN CONVERSIONE S. PAULI, APOSTOLI
Festum

Ant. ad introitum 2 Tim 1, 12; 4, 8
Scio cui credidi, et certus sum quia potens est
depositum meum servare in illum diem, iustus iudex.

Dicitur Gloria in excelsis.

Collecta
Deus, qui universum mundum
beati Pauli apostoli prædicatione docuisti,
da nobis, quaesumus,
ut, cuius conversionem hodie celebramus,
per eius ad te exempla gradientes,
tuæ simus mundo testes veritatis.
Per Dominum.

Super oblata
Illo nos, quaesumus, Domine, divina tractantes,
fidei lumine Spiritus perfundat,
quo beatum Paulum apostolum
ad gloriæ tuæ propagationem iugiter collustravit.
Per Christum.

Præfatio I de Apostolis
Vere dignum et iustum est, æquum et salutare,
nos tibi semper et ubique gratias agere:
Domine, sancte Pater, omnipotens æterne Deus:
Qui gregem tuum, Pastor æterne, non deseris,
sed per beatos Apostolos continua protectione custodis,
ut iisdem rectoribus gubernetur,
quos Filii tui vicarios eidem contulisti præesse pastores.
Et ideo cum Angelis et Archangelis,
cum Thronis et Dominationibus,
cumque omni militia cælestis exercitus,
hymnum gloriæ tuæ canimus,
sine fine dicentes: Sanctus, Sanctus, Sanctus...

Ant. ad communionem Cf. Gal 2, 20
In fide vivo Filii Dei, qui dilexit me,
et tradidit semetipsum pro me.

Post communionem
Sacramenta quæ sumpsimus, Domine Deus noster,
in nobis foveant caritatis ardorem,
quo beatus apostolus Paulus vehementer accensus,
omnium pertulit sollicitudinem Ecclesiarum. Per Christum.

Benedictio Solemnis
Deus, qui vos in apostolicis tribuit consistere fundamentis,
benedicere vobis dignetur
beati Apostoli Pauli
meritis intercedentibus gloriosis.
R. Amen.
Et apostolicis præsidiis vos pro cunctis faciat testes veritatis,
qui vos eorum munerari documentis voluit et exemplis.
R. Amen.
Ut eorum intercessione
ad æternæ patriæ hereditatem pervenire possitis,
per quorum doctrinam fidei firmitatem possidetis.
R. Amen.
Et benedictio Dei omnipotentis,
Patris, et Filii, + et Spiritus Sancti,
descendat super vos et maneat semper.
R. Amen.

[marcobo88]

Die 26 ianuarii

Ss. Timothei et Titi, episcoporum

Memoria

Ant. ad introitum Ps 95, 3-4
Annuntiate inter gentes gloriam eius,
in omnibus populis mirabilia eius,
quoniam magnus Dominus et laudabilis nimis.

Collecta
Deus, qui beatos Timotheum et Titum
apostolicis virtutibus decorasti,
utriusque intercessione concede,
ut, iuste et pie viventes in hoc s.culo,
ad cælestem mereamur patriam pervenire.
Per Dominum.

Super oblata
Suscipe, quaesumus, Domine, munera populi tui,
pro beatorum tuorum Timothei et Titi festivitate delata,
et sincero nos corde perfice benignus acceptos.
Per Christum.

Praefatio de Sanctis Pastoribus
Vere dignum et iustum est, æquum et salutare,
nos tibi semper et ubique gratias agere:
Domine, sancte Pater, omnipotens æterne Deus:
per Christum Dominum nostrum.
Quia sic tribuis Ecclesiam tuam sanctorum Timothei et Titifestivitate gaudere,
ut eam exemplo piæ conversationis corrobores,
verbo prædicationis erudias,
grataque tibi supplicatione tuearis.
Et ideo, cum Angelorum atque Sanctorum turba,
hymnum laudis tibi canimus, sine fine dicentes: Sanctus, Sanctus, Sanctus…

Ant. ad communionem Mc 16, 15; Mt 28, 20
Euntes in mundum universum, prædicate Evangelium:
ego vobiscum sum omnibus diebus, dicit Dominus.

Post communionem
Sacramenta quæ sumpsimus, Domine Deus noster,
illam nobis fidem innutriant,
quam et apostolica docuit prædicatio,
et beatorum Timothei et Titi sollicitudo custodivit.
Per Christum.

[marcobo88]

HEBDOMADA III “PER ANNUM”

Ut supra, in diebus 21 et 23 Ianuarii.

Vel:

Die 27 ianuarii

S. Angela Merici, virginis

Collecta
Pietati tuæ, quaesumus, Domine,
nos beata virgo Angela commendare non desinat,
ut, eius caritatis et prudentiæ documenta sectantes,
tuam valeamus doctrinam custodire et moribus profiteri.
Per Dominum.

[marcobo88]

DOMINICA IV “ PER ANNUM ”

Ant. ad introitum Ps 105, 47
Salvos nos fac, Domine Deus noster,
et congrega nos de nationibus,
ut confiteamur nomini sancto tuo,
et gloriemur in laude tua.

Collecta
Concede nobis, Domine Deus noster,
ut te tota mente veneremur,
et omnes homines rationabili diligamus affectu.
Per Dominum.

Super oblata
Altaribus tuis, Domine,
munera nostræ servitutis inferimus,
quæ, placatus assumens,
sacramentum nostræ redemptionis efficias.
Per Christum.

Praefatio de Dominicis “Per Annum” IV (In dominica)
Vere dignum et iustum est, æquum et salutare,
nos tibi semper et ubique gratias agere:
Domine, sancte Pater, omnipotens æterne Deus:
per Christum Dominum nostrum.
Ipse enim nascendo vetustatem hominum renovavit,
patiendo delevit nostra peccata,
æternæ vitæ aditum praestitit a mortuis resurgendo,
ad te Patrem ascendendo cælestes ianuas reseravit.
Et ideo, cum Angelorum atque Sanctorum turba,
hymnum laudis tibi canimus, sine fine dicentes: Sanctus, Sanctus, Sanctus…

Praefatio Communis IV (In feriis)
Vere dignum et iustum est, æquum et salutare,
nos tibi semper et ubique gratias agere:
Domine, sancte Pater, omnipotens æterne Deus:
Quia, cum nostra laude non egeas,
tuum tamen est donum quod tibi grates rependamus,
nam te non augent nostra præconia,
sed nobis proficiunt ad salutem,
per Christum Dominum nostrum.
Et ideo, choris angelicis sociati,
te laudamus in gaudio confitentes: Sanctus, Sanctus, Sanctus…

Ant. ad communionem Cf. Ps 30, 17-18
Illumina faciem tuam super servum tuum,
et salvum me fac in tua misericordia.
Domine, non confundar, quoniam invocavi te.
Vel: Mt 5, 3-4
Beati pauperes spiritu,
quoniam ipsorum est regnum cælorum.
Beati mites, quoniam ipsi possidebunt terram.

Post communionem
Redemptionis nostræ munere vegetati, quaesumus, Domine,
ut hoc perpetuæ salutis auxilio
fides semper vera proficiat.
Per Christum.